No marco da campaña “Sementar, non contaminar – Bombas de semente para o EcoBosque”, impulsada polo Proxecto EcoBosque do río Sar, o Colexio Santa Apolonia-Crea Natura converteuse esta semana nun auténtico laboratorio vivo de ecoloxía e emoción. Desde Educación Infantil até Bacharelato, o alumnado participou nun obradoiro de elaboración de bombas de sementes, integrando a dimensión pedagóxica do centro co espírito do Día Mundial do Medioambiente.
Guiado por persoal do Proxecto EcoBosque, o taller achegou ao alumnado á técnica xaponesa do Nendo Dango, un método de agricultura natural que utiliza arxila, compost e sementes autóctonas (como carballo, acivro, freixo ou castiñeiro) para crear pequenas cápsulas de biodiversidade. Sen plásticos nin ferramentas, só mans e natureza.
Un centro que educa sementando vínculos
Un dos valores de Santa Apolonia-Crea Natura é ofrecer unha alternativa educativa que pon ao neno e o seu vínculo coa natureza no centro de todo o proxecto, fomentando un desenvolvemento harmónico, autónomo e respectuoso tanto co individuo como coa contorna. Por iso, actividades como este obradoiro encaixan plenamente na súa proposta: unha educación que se vive, se toca e se sente.
A participación activa de alumnado de diversas idades nun mesmo taller converte o coidado do medioambiente nunha vivencia compartida, transversal e interxeracional. Os máis pequenos manipularon a terra coa ilusión da primeira vez; os maiores asumiron responsabilidades como referentes, mentres toda a comunidade escolar creaba memoria ecolóxica e identidade colectiva.
Emoción, aprendizaxe e acción directa combináronse nun día que deixa pegada, fomentando valores como a responsabilidade, a paciencia, o coidado mutuo e o respecto pola vida en todas as súas formas.
Esta actividade forma parte da campaña “Sementar, non contaminar”, que busca poñer fin á contaminación por plásticos e restaurar a biodiversidade de ribeira do río Sar a través da participación cidadá, especialmente da mocidade.
O proxecto ECOBOSQUE é unha iniciativa de restauración ecolóxica do río Sar e do Banquete de Conxo como espazo de saúde, educación ambiental e benestar, e conta co apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea–NextGenerationEU.