Este luns 10 de xuño, o alumnado do IES Eduardo Pondal participou nunha xornada de plantación de bombas de semente como parte das actividades do Proxecto EcoBosque, unha iniciativa de restauración ecolóxica impulsada polo Concello de Santiago.
Durante a mañá, os estudantes dirixíronse ao entorno do Banquete de Conxo, onde levaron a cabo o lanzamento e soterramento de bombas de semente elaboradas previamente no centro educativo. Estas bombas, compostas por arxila, substrato e sementes autóctonas como carballo, acivro ou castiñeiro, foron colocadas de maneira estratéxica nunha zona degradada do bosque, coa finalidade de favorecer a rexeneración da vexetación nativa.
A actividade foi tamén unha oportunidade para reflexionar sobre a importancia de conservar e recuperar os espazos naturais urbanos. En conexión co lema da campaña “Sementar, non contaminar”, o alumnado viviu unha experiencia práctica de coidado ambiental, contribuíndo con pequenos xestos a un gran cambio.
O IES Eduardo Pondal amosa así o seu compromiso cunha educación ambiental activa, baseada na participación, na responsabilidade ecolóxica e no respecto polo medio.
O Proxecto EcoBosque é unha proposta de restauración e dinamización do bosque de ribeira do río Sar e o espazo do Banquete de Conxo, co obxectivo de transformalo nun lugar de saúde, aprendizaxe e benestar. Conta co apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.